suplemen pjj 10-16 mei 2015

Suplemen Pjj Tanggal 10-16 Mei 2015, ogen Matius 28:19; 1 Korinti 11:24-26

Renungan

Ogen  : Matius 28:19; 1 Korinti 11:24-26
Tema  : Sakramen Ibas GBKP
Tujun:
1.    Gelah ngawan ni perpulungen ngangkai erti ras makna sakramen si lit ibas GBKP
2.    Gelah ngawan ni perpulungen ncidahken ulih sakramen bas kegeluhen si tep-tep wari.

GBKP si ipanteki menaken Sehna Berita Simeriah 18 April 1890 I Buluh Awar eme gereja si beraliren Calvinis (berpedoman kepada Johanes Calvin). Salah sada tokoh reformasi gereja siterjadi ibas abad 16 (1517) isamping Martin Luther eme Johanes Calvin. Kerna Sakramen, Johanes Calvin menetapken dua ngenca sakramen eme lakon Pridin Sibadia (Pridin kitik ntah pe mbelin) ras lakon Persadan Sibadia, beda ras Gereja Katolik simenetapken 7 Sakramenna eme Pembaptisan, Penguatan, Ekaristi, Rekonsiliasi/Pengakuan Dosa, Pengurapan Orang Sakit, Imamat ras Pernikahen. Alasan Calvin menetapken dua sakramen eme erkiteken dua hal e ngenca isingetken ibas Pustaka Sibadia gelah ilakoken, antara lain si tersurat ibas ogen PJJta eme Matius 28:19 kerna Peridin ras 1 Korinti 11:24-26 kerna lakon Persadan Sibadia.

Matius 28:19 eme si igelari pe “Amanat Agung”. Ibas ayat enda lit lit 3 hal isingetken gelah ilakoken eme: (1) Laweslah ku kerina bangsa manusia. Enda ertina, ajar-ajar si enggo tek e la terjeng ipegegehi kinitekenna kenca enggo idahna Yesus Kristus keke ibas simate nari ntah alu kata sideban “keJuruslamaten Yesus e (Ia me Mesias e) la ngadi terjeng kelompok ajar-ajar tapi man kerina jelma emaka isuruh lawes. Tugas enda tentu la gampang emaka ibas ayat 18 leben enggo isingetken Yesus maka man baNa enggo ibereken kerina kuasa I surga ras I doni ras enda enggo ibuktiken ibas kekekenNa bagepe ibas ayat 20b ija Yesus ngataken “...ingetlah! Aku tetap kap ras kam she ku kedungen jaman”. (2) Bahanlah ia ajar-ajarKu. Tentuna guna banci jadi ajar-ajar aruslah lebe lit pemuridten. Bagi 12 ajar-ajar. Tugas enda penting sabab amin gia 12 kalak secara khusus enggo imuridken Yesus ternyata sada eme Judas Iskariot berkhianat, apai ka la imuridken secara mehuli. Emaka pedah enda isehken secara khusus man ajar-ajar segelah njadiken kerina jelma jadi ajar-ajar Yesus. (3) Peridiken ibas gelar Bapa, Gelar Anak ras gelar Kesah Sibadia[1]. Ibas ayat enda la ikataken gelah iperidiken alu selam ntah percik. Siikataken “peridiken ibas gelar Bapa, gelar Anak ras ibas gelar Kesah Sibadia eme sababna GBKP ngakui baptisen selam ntah la selam siilakoken gereja sideban. Adi lit kalak atena jadi anggota GBKP ras ia ndube enggo ibaptis selam lanai ilakoken baptisen ulang man kalak e, tapi iajari ia rikut ras konfesi GBKP. Hal enda nuduhken GBKP memahami maka peristiwa peridin e labo soal materina (soal launa ras jenari I percik ntah I selam) tapi erti ras makna peridin si ilakoken ibas gelar Tritunggal eme Bapa, Anak ras Kesah Sibadia. Emaka adi enggo iperidiken lanai arusna iperidiken ka sabab peridin e labo main-main.

Erti ras makna peridin eme:

1. Tanda pengalemi dosa ras nggeluh simbaru, nuduhken maka kita enggo ikut ibas kematen ras kekeken Yesus Kristus ras enggo jadi sada ras Ia (Roma 6:3-4).
2. Jadi tanda inisiasi (bengket) ku bas persekutuan gereja selaku kula ni Kristus (Bd. 1 Korinti 12:13).
3. Ipahami pe selaku tanda maka kalak si enggo iperidiken enggo ngaloken pengalemi dosa ras keselamaten.

Jadi kerina kalak si enggo iperidiken arusna enggeluh ibas kegeluhen simbaru eme kegeluhen si enggo berubah ras erbuah. “Lanai aku si nggeluh, tapi Kristus kap si nggeluh i bas aku. Kegeluhenku si genduari i bas doni enda kugeluhken erkiteken kiniteken man Anak Dibata, si ngkelengi aku dingen ngendesken diriNa man gunangku” (Galatia 2:20).
1 Korinti 11:24-26 eme ngerana kerna Lakon Persadan Sibadia. Ibas bagin enda isingetken Paulus maka Lakon Persadan Sibadia eme pengajaren sinialokenna Ibas Tuhan nari ras iterusken ilakoken itengah-tengah perpulungen (ayat 23). Erti ras makna lakon Persadan Sibadia eme:

1. Gelah nginget Yesus Kristus ras kai si enggo ilakokenNa guna keselamatenta gelah alu bage kinitekenta mulihi ipeteguhi (ayat 24).
2. Guna nginget pengorbanen Yesus Kristus. Ibas paksa kita man roti ras minen anggur, kita ibabai membayangken ntah nginget kai si enggo ilakoken Yesus kristus man gunanta. Kulana enggo ikorbankenna gunanta[2] ras darehna enggo mambur guna mbersihken kita ibas kerina dosa ras kejahatenta (ayat 25-26).
3. Guna nginget pengalamen keselamatenta. Selain nginget pengorbanen Yesus man gunanta, si inget pe paksa kita secara pribadi enggo ngaloken Yesus selaku Tuhan ras Juruslamatta.
4. Nginget kalak silenga tek man Yesus Kristus. Arah Lakon Persadan Sibadia kita ipersingeti kerna tanggungjawab si arus ikerjaken eme meritaken kematen Yesus kristus gelah kalak sideban pe banci ngaloken kegeluhen si rasa lalap (ayat 26).
5. Gelah nginget pentingna persadan. Lakon Persadan Sibadia pe lit makna kiniersadan selaku kula ni Kristus ras Kristus selaku kepalana. Arah lakon enda pe kita imotivasi segelah la nirangi perpulungen (Bd. Ibrani 10:25).