SUPLEMEN PJJ 24- 30 MEI 2015 RG GBKP CENGKARENG

SUPLEMEN PJJ 24- 30 MEI  2015 RG GBKP CENGKARENG

(Pdt. Jenny Eva Karosekali STh. M.Min)

OGEN : GALATI 5:22-26                                                                   Tema: “Idemi Kesah Si Badia”

LATAR BELAKANG

Kitab Galati enda eme surat rasul Paulus man perpulungen Galati, janah ibas suratna enda Paulus mpersingeti ras  menasehati perpulungen, sebab ibas perpulungen paksa sie lit kelompok Kristen  Yahudi sitetap njemak ajaran agama Yahudi si mereken penekanen maka keselamatan labo bias adi terjeng tek man Yesus Kristus saja, tapi pe harus patuh ngikuten ras ndalanken UU ras Taurat Musa, khususna kerna sunat. Jadi lit pemahamen maka adi la isunatken ras la ndalanken dingen ngelakoken keria aturen ras UU Taurat kalak Jahudi maka labo banci jadi kalak Kristen si tuhu-tuhu. Bagepe masalah sideban eme litna pengajuk gelah perpulungen ngelawan Paulus, sebab lit si ngatakenca maka Paulus labo rasul.  Arah suratna enda Paulus mbela dirina selaku rasul Jesus Kristus  guna mabai kalak si nggo papak ibas pengajaren e mulihken ku kiniteken si payo. Enda ibahan Paulus sebab, perpulungen Galati, Paulus sendiri kap simantekisa.      

Penjelasen Teks :

1.      Bagin si jadi perikop ogen PJJnta minggu enda Gal. 5: 22-26 eme bagin penjelasen Paulus kerna Ulih Pendahin Kesah. Paulus mereken penjelasan maka kalak si enggo tek man Yesus Kristus,  berarti “kerincuhen daging”  lanai ngkuasai dirina,  sebab sipat-sipat kedagingan enggo mate i kayu persilang, tapi si lit eme ulih Kesah Si Badia. Ulih Kesah Si Badia lit erkiteken batang si mejile, janah batang e eme Yesus Kristus (band. Yohanes 15). Lanai nggeluh rikutken sura-sura ukur manusia sebab sura-sura ukur manusia erlawanen ras Kesah Si Badia. Paulus alu tangkas mereken perbandingen kerna uga kin biak-biak geluh si arus lit ras teridah ibas kalak si nggo tek man Kristus.  Janah adi kalak si nggo itegu-tegu Kesah Si Badia menurut Paulus ia lanai nggeluh iteruh UU tapi nggo jadi kalak bebas,  bebas ibas kutukan Hukum taurat. Paulus ngataken enda sebab keselamatan labo arah ndalanken hal-hal si formalitas ras atuen-aturen agama, tapi erkiteken kiniteken  man Tuhan Yesus  ras nggeluh alu pengajari Kesah Si Badia.

2.      Paulus  ncidahken maka ulih Pendahin Kesah e tangkas ras teridah ibas kegeluhen kalak si tek, janah terbedaken nge arusna kalak si nggeluh ibas ia Kesah Si Badia ras si lang sebab berbeda ras erlawanen kal nge cara nggeluh kalak si nggo tek man Kristus si nggo iiani Kesah Si Badia. Paulus nuriken maka lit  9  karakter si arus teridah ibas kegeluhen kalak si tek dingen si iiani Kesah Si Badia janah enda me si arus jadi gaya geluhta (lifestyle) kalak si tek, antara lain eme:

1. Keleng Ate
2. Keriahen Ukur
3. Kemalemen Ate (Damai Sejahtera)
4. Kesabaren  :
5. Erbahan si mehuli (Kemuahan Hati)
6. Mehuli (Maba Kiniulin)
7. Setia
8. Meteruk Ukur
9. Penguasaan Diri

3.      Ay. 24-26 : Paulus  menegasken maka kalak si nggo jadi sikerajangen Kristus  perukurenna secara manusa nggo ibunuhna I kayu persilang rikut ras kerincuhen dagingna bagepe sura-surana, emaka arusna lanai lit si nggeluh meganjang ukur, sitokoh-tokohen ras si cian-cianen, ertina lagu langkahta ras pengkebetta kerina nggo arus rikutken peraten Kesah ras ncidahken biak-biak ras “karakter /buah Roh Kudus. Sebalikna adi bas perpulungen lit  denga tetap turah kiniganjangen ukur, la lit kekelengen, la lit kesabaren, erbahan si la mehuli ras la ngasup ngkuasai dirina, rsd berarti nggo ngelawan Kesah Si Badia, pasti  ije la lit keriahen ras kemalemen ate. Jadi alu litna ulih Kesah Si Badia ibas diri anggota perpulungen maka siterjadi i tengah-tengah perpulungen eme hubungen si harmonis, bagepe perpulungen ndalanken kai siisura-suraken Kesah Si Badia, alu bage maka la sia-sia kematen Yesus Kristus i kayu persilang. Mari dage si evaluasi kegeluhen perpulungenta, subuk ibas sektorta bagepe kegeluhen ibas jabunta sekalak-sekalak, usuren nge teridah ulih pendahin Kesah ntah sura-sura ukur manusia ije si dominan ?

APLIKASI

 Ibas kita mperingeti  minggu nusurna Kesah Si Badia, maka perlu siteh Kesah Si Badia eme Tuhan sendiri. Janah fungsi Kesah Si Badia nampati kita gelah kita tetap nggeluh badia ras nggeluh ibas persadan ras Jesus Kristus. Adi siperdiatekenkegeluhen kalak kristen, nterem denga simprakteken kegeluhen si la ngena ate Tuhan, melala denga si nggeluh rikutken kerincuhen daging ras sura-sura ukurta. Arah bahan PJJnta enda kita ipersingeti gelah bertobat, jera dingen robah, mere dirinta ipimpin Kesah Si Badia si nggo nusur man banta. Adi ateta nggeluh ibas pendahin Kesah Si Badia maka kita arus mpediat Kesah Si Badia erdahin bas pusuh ras perukurenta. Carana Kesah Si Badia nggeluh eme kita arus ertoto, tutus ku perpulungen ras ku kebaktin gereja. Kerina enda arus ilakoken alu meriah ukur. Sebab ibas kita tutus maka terjadi me internalisasi kegeluhen. Emaka lanai sura-sura ukurta sipejangjang ibas diri ras geluhta tapi “Tunduk” ras Taat” nandangi sura-sura Kesah si merentah bas dirinta. Alu bage kita idemi Kesah Si Badia. Adi nggo idemi Kesah Si Badia maka alu sendirina lit me bas kita nari ulih Kesah Si Badia.

                                       SELAMAT MELAYANI & TUHAN MEMBERKATI