SERMON PA MORIA TGL 07-13 JUNI 2015 RG. GBKP CENGKARENG Pdt Jenny Eva Karosekali STh., M.Min

SERMON PA MORIA TGL 07-13 JUNI 2015 RG. GBKP CENGKARENG

Pdt Jenny Eva Karosekali STh., M.Min

Ogen : Roma 13:1-5                                                                                   Tema:“POLITIK”

Bena Kata :

Surat Roma isuratken Paulus sekitar tahun 50 an Masehi. Rikutken cataten sejarah maka kalak Kristen i Roma nggeuh ibas kiniseran si mesangat, nggeluh ibas kebiaren, ianiaya, iayak-ayak janah ibunuh pe, iadu ras binatang buas jadi hiburan man Kaisar bagepe pembesar2 kalak Roma. Ertina kiniseran e la ngenca ibas kalak si lenga nandai Kristus tapi pe termasuk ibas pemerentah Romawi si paksa e erkuasa. Bage kal sangatna kiniseran kalak si tek tupung paksa si e, emaka melala nge kalak ngataken Paulus  “Rasul Gila” tupung isuruhna  perpulungen i Roma gelah patuh man pemerintah si kejam, si menganiaya kalak Kristen Roma.

"Uga ninta harus tetap patuh, adi iperlakuken alu semena-mena, la adil dingen teraniaya?"

 Penjelasen Teks, Point-point ras Garis besar :

Ay. 1 : Ibas ayat enda lit dua pengajaren siisehken Paulus,

1. Maka Dibata me si mutlak pemegang pemerintahan nandangi kerina bangsa-bangsa.

Dibata nge si netapken pemerentah, sabab labo lit pemerentah si la ibas Dibata nari, janah pemerentah si lit genduari e pe Dibata nge netapkenca.

2. Erkiteken si e maka kerina kalak si tek (perpulungen) I Roma arus patuh man pemerentah si erkuasa, taat nandangi kekuasaan si sah, sepanjang ketaatan ei la bertentangen tentuna ras hukum Kristus, ras wajib notoken pemerentah si sangana erkuasa (1 Tim 2:1-7). Jadi rikutken ayat enda maka kita arus tunduk nandangi kuasa pemerentah mulai ibas si tertinggi seh terendah, mulai ibas  bapak Presiden sampai seh ku RT. Paulus ngidah maka kalak Yahudi nggit memberontak, la ngenca ngelakoken teror nandangi pemerintah Romawi; tapi pe ngelakoken tindakan perlawanan si anarkhis, mis : ngancurken rumah-rumah ras pe nggit munuh kalak Yahudi si nggalar upeti man pemerintah Romawi. Enda si la isetujui Paulus sebab bertentangen ras biak ras pengajaren kalak Kristen.

Ay. 2 : Ijenda Paulus ngataken maka kalak si ngelawan pemerentah la patuh nandangi kai si nggo itetapken Dibata janah kalak si bage perbahanenna ertina ilegina ukumen nandangi dirina jine.

Ay.3-5 : Pemerentah labo man kebiarenken, kalak si jahat perbahanenna nge si mbiar. Emaka adi perbahanen si mehuli nge siilakoken kita, lalit alasenta mbiar man pemerentah. Kalak si tek iajuk Paulus maka pemerintah eme persuruhen Dibata. Istilah si ipakai ijenda eme diakonos atau Diaken. Alu bage fungsi pemerintah e arusna erguna nandangi kerina kalak si mehuli perbahanenna, sebab justru pemerentah nge persuruhen Dibata si erdahin guna kiniulin perpulungen.  Enda kap si jadi persoalan, sebab Paulus pe tentu itehna kerna penyelewengan ras pemerasan siilakoken pemerentah Roma.  Paulus ras perpulungen kalak si tek I Roma pe mengalami penganiayaan ka nge.  Labo la iteh Paulus si e kerina, saja ngenca arah suratna  Roma 13 enda, ia menutut kalak si tek guna makeken biak Kristus, la erbalas man kalak si ngelakoken si jahat, tapi sebalikna iajukna guna patuh man  Pemerintah. Alasenna eme Roma 12:17-19,  pengakuan maka pemerintahan eme persuruhen Dibata. Janah kepatuhen nandangi pemerentah e ipindoken Paulus labo erkiteken mbiar iukum saja tapi erkiteken pusuh peratenna kin ersuruh guna patuh.

Tema : POLITIK

Kata politik e sendiri erasal ibas kata Yunani “Polis” (kt. Benda) siertina “Kota” ntah sada “Komunitas”. Kata lain ibas politik e sendiri eme “Politea” ertina “Warga Negara – Negara Kesejahtraan” janah lebih iertiken Plato ibas bukuna “Politea” ibas pengertin “Mengatur Masyarakat”. Ibas perkembangenna pengertin politik pe mengalami erbage – bage pengertin tapi hakekatna eme gelah terselenggara pemerintahen ibas ada negara alu mehuli. Emaka ibas pengertin sienda maka lanai bo tabu adi kita ngerana kerna politik ras seharusna kin kita ibassa berperan serta guna banci pehuliken kegeluhen kerina manusia, hal sie senada ras si isingetken nabi Yeremia “Erdahinlah guna kiniulin kuta – kuta, kuja kam enggo ku buang jadi tabanen. Ertotolah guna keperlun kuta e, sebab adi sikap ia kam pe ikut sikap” (Yer 29 : 7).

Labo lit si salah ibas pengertin Politik, memang enterem kita genduari berpikiren negatif nandangi politik, erkiteken ibas perpolitiken genduari rusur terjadi kecurangan ras kekerasan seh maka dunia politik pe menghadirken istilah “Tidak ada kawan abadi yang ada hanya kepentingan pribadi”, engkai maka bage sebab politik sigenduari lebih berbicara ku arah “suksesi”. Pengertin ras tujun politik genduari enggo menyimpang ndauh ibas pengertin asli politik e sendiri. Inti oraten bahan PA – Moria sekali enda pe ningetken gelah terjadi kegeluhen simehuli antara pemerentah ras rakyat, emaka ibas sie Paulus ningetken gelah lit min kepatuhen kerina kalak kristen nandangi pemerentah erkiteken pemerentah e sendiri Dibata kap sinetapkenca ras tentu pemerentah pe arus ertanggung jawab guna pehuliken rakyatna. Dikune pemerentah la makeken peranna alu mehuli, tentu la banci lang kita pe arus ikut muat bagin guna pehulikenca (Rom 13 : 1 – 5). Nggo waktuna kita ikut mpekana – kena kegeluhen masyarakatta gelah reh ulina, arah PA – Morianta enda ibabai Moria guna meteh ras memahami kerna erti “Politik”, janah adi lit kemampun guna berpolitik maka termotivasi guna makeken kngasupen ras pemetehna e guna kesejahteraan masyarakat arah perjuangan politik. Jaman genduari nggo melala  si idah diberu terjun kubas dunia politik dingen enterem si berhasil maba perubahen ku doni enda, emaka pengarapenta ku depan reh buenalah diberu ikut berperan, khususna ibas Moria GBKP nari lit hadir ahli politik ntah pe terjun kubas dunia perpolitiken gelah lebih teridah perannta mewarnai perpolitiken negrinta enda alu tujun guna kiniulin ras  mpekena – kena kegeluhen masyarakat ras bangsa ija kita tading itempatken Tuhan.

SELAMAT MELAYANI & TUHAN MEMBERKATI