BIMBINGEN PA MAMRE 07-13 JUNI 2015 RG. GBKP CENGKARENG Pdt Jenny Eva Karosekali STh. M. Min.

BIMBINGEN PA MAMRE 07-13 JUNI 2015 RG. GBKP CENGKARENG

Pdt Jenny Eva Karosekali STh. M. Min.

Ogen : Lukas 12:13-21                                                                            Tema: “Ula Merangap”

Tujun : 1. Gelah Mamre njaga diri nandangi godaan erta doni/kerangapen ras sikap nggeluh erbana-bana.

                                                                                                         

Penjelasen Teks Ogen :  

1.    Ibas teks ogen PA Mamre enda nuriken kerna perumpamaan kalak bayak si lenge. Tupung Yesus sangana ngajar I kuta Jerusalem lit sekalak ibas si nterem nari  mindo man Yesus gelah isampatiNa ia ndungi persoalen warisan orang tuana ras seninana. Tapi Yesus la nggit ngerunggui persoalen erta tading-tadingen e sebab nina Jesus maka e labo bagin ibas dahin/tugas ras misi pelayanenNa (Ay. 13 - 14).  Situhuna permasalahen e labo perlu jadi persoalen si mberat si melibatken kalak si deban guna ndungisa janah banci idungi alu mehuli ras arih-arih ras seninana adi la lit ibas kalak e biak merangap. Emaka ipersingeti Jesus jelma sinterem e nina: “Jaga dinge metengetlah maka ola kam merangap nandangi kai pe, sabab kegeluhen manusia si tuhu-tuhu labo erpalasken erta-erta si lit ibas ia, amin uga pe ia bayakna” (ay. 15 ).

2.    Menurut Yesus, kegeluhen manusia si tuhu-tuhu labo erpalasken erta/kinibayaken doni enda, sebab labo e ulu keriahen ras kemalemen ate si tuhu-tuhu. Erta ras kinibayaken e fana ras sementara ngenca sifatna janah dame sejahtera ras keriahen si banci ibereken erta doni labo dame sejahtera rikutken kriteria surgawi sebab la jaminen uga pe bayakna sekalak jelma ialoken kemalemen ate arah erta-ertana. Kai kin ertina bicara idat kita gia doni enda ras kebayakenna adi labo dame dingen malem pusuhta  janah geluhta e la erguna. Kai ertina erta kebayaken adi kita kebenen erta si mehergana, lanai meriah ras senina, bene dame sejahtera.

3.    YESUS erpenulak guna ndungi persoalan tading2en e erkiteken : Yesus ngidah biak merangap si turah ije. Sebab perselisihan/persoalen e jadi nggambarken  maka lit ije sura-sura pihak si ersoal e guna ndatken lebih asangken siitetapkan secara adil.  Erta warisan eme hak pakai turun temurun, labo bekasna latih encari,  tapi ijenda si mindo penampat Jesus enda ersura-sura guna ndatken erta tading2en e guna bana janah dingen ngkuasaisa. Emaka ipersingeti Yesus ijenda maka kinibayaken/erta labo ukuran/jaminan kegeluhen manusia.

4.    Alu perumpamaan kalak bayak si lenge, ate Yesus ngubahken cara pandang kalak si merangap e gelah perayakenna lanai kubas erta doni tapi  gelah jadi bayak iadep-adepen Dibata. Kerangapen kalak bayak si lenge e erbahanca turah kiniganjangen ukur janah iakapna banci jadi jaminen kegeluhenna. Tapi tupung ibuat Dibata kesahna ertana e labo ngasup nelamatken ia. Pesan moralna: Man kai kerina erta ras kebayakenna si ergun-gun e adi bene kesahna? Paulus ibas 1 Tim 6:10 ngataken : “merangap nandangi duit eme sumbul kerina kejahaten” Ertina biak merangap e mabai kita ndabuh kubas erbage-bage kejahaten.

5.    Kalak si merangap nandangi erta, iperbudak ertana ia, janah kerangapen e mabai kecedaan bas kegeluhenta, ceda ibanna perseninan, perkade-kaden, ceda kinitekenta, ceda kegeluhenta, jadi sumber malapetaka ras maba kehancuran ibas kegeluhenta. Emaka arah bahan PA enda ipersingeti kerina Mamre gelah ngasup njaga diri gelah ula ikuasai kerangapen doni, menghalalkan segala cara guna ndatken kebayaken. Tapi erlajar terus guna ngasup makeken erta guna maba kiniulin man banta bagepe kalak si deban, makeken kinbayaken e jadi alat pemersatu labo penghancur keluarga, jadi alat mensejahterakan kegeluhenta radu ras janah guna kemulian Dibata.  Yesus ngajuk kita gelah erlumba bayak ilebe-lebe Dibata, ertina bayak kita ibas keleng ate, erbahan si mehuli man senina bagepe kalak si deban, erbahan terpuji gelar Dibata arah kerina silakoken kita. Mari bebasken ras pedauh dirinta ibas biak merangap, janah semangati dirinta guna erlumba ibas perbahanen si mehuli, nggit berbagi ras erlumba ibas neken keleng ate, tandana kita bayak iadep-adepen Dibata.

SELAMAT MELAYANI & TUHAN MEMBERKATI

(Pdt. Jenny Eva Karosekali STh. M.Min)