Bimbingen PJJ Tgl 14 – 20 Juni 2015 by Pdt. Juris Tarigan

Bimbingen PJJ  Tgl  14 – 20  Juni  2015

Ogen :  Matius 23 : 23

Tema :  “Nehken Persepuluhen Alu Pusuh Si Bujur”

Tujun :  1.    Gelah ngawan ni perpulungen ngangkai maka persepuluhen eme tanggung-jabap kalak si erkiniteken.

              2.    Ngasup ngendesken dirina jadi persembahen si nggeluh.

             

I.    Kata Perlebe

      Sekali ibas tep-tep tahun bimbingen PJJ ta ngerana kerna persembahen persepuluhen. Arah Kata Dibata si jadi palas kerna persembahen persepuluhen ngerana Tuhan ngajari kita gelah reh tangkasna man banta kerna persepuluhen dingen reh teridahna ngawan ni perpulungen terlebih serayan-serayan Tuhan (pandita, pertua ras diaken) nehken persembahen persepuluhenna man Tuhan. Uga enggo realisasina ibas tahun ku tahun? Reh teridahna ras reh erkualitasna ntah lenga? Wari enda nggo ka seh ogenta banta si ngerana kerna persepuluhen. Mari ula erleja-leja erlajar gelah reh ngasupna kita nehken tanggung-jabapta man Tuhan.

II.   Isi

      Matius 23 mereken pengajaren ras persinget Tuhan Jesus man jelma si enterem ras ajar-ajarNa kerna guru-guru agama (ahli Taurat ntah pe si meteh surat) ras kalak Parisi. Guru-guru agama ras kalak Parisi ipandang Tuhan sebage kalak pekulah-kulah. Ia sebage penerus ngajarken ajaren-ajaren Musa la nggeluh sue ras kai si ajarkenna. Kai si ajarkenna la idalankenna (ayat 1-3).

Mulai ibas ayat 13-29 lit 8 kali Tuhan Jesus melasken kata “Andiko, cilaka kal kam o guru-guru agama janah kam pe o kalak Parisi!’. Kata “cilaka” ialamatken Tuhan man guru-guru agama ras kalak Parisi. Uga kin bentuk kemunafikan (pekulah-kulah) guru-guru agama ras kalak Parisi enda? Ibas ayat 23 icidahken man banta uga guru-guru agama ras kalak Parisi ndalanken kata Dibata kerna nehken persembahen persepuluhen. Teridah kal maka patuh  ras megermet kal (teliti dan cermat) guru-guru agama ras kalak Parisi ndalankenca. La terjeng nehken persembahen persepuluhen ibas hasil utama juma ras asuh-asuhenna bagi gandum, lembu ras keledaina, tapi pe nehken persepuluhen arah hasil sampingen ntah pe tambahen si sitik ngenca ibas hasil utama jumana eme: jera, lenga ras serei. Tapi si pentingna ibas undang-undang (Taurat) la kepe iperdiatekenna dingen dalankenna, e me kap keadilen, keleng ate ras kinibujuren. Ndalanken Undang-undang Tuhan arus alu menyeluruh, la banci tanggung ntah pe sada-sada bagin saja. Sada bagin arus idalanken (persembahen persepuluhen), alu la ngelupaken si debanna eme ndalanken keadilen, keleng ate ras kebujuren.

III.      Pengkenaina

1.      Nehken persembahen persepuluhen eme persuruhen ras perentah Dibata jine man kalak Israel bage pe man banta kalak si tek man Tuhan Jesus si enggo ikelengi ras ipasu-pasuNa. Kata persepuluhen ntah pe perpuluhen secara harafiah ertina ‘sepersepuluh bagin’. Bangsa Israel bage pe kita kalak si tek wajib nehken persepuluhen hasil sinuan-sinuan, asuh-asuhen bagepe arah perulihen si deban, sebage pengakun bahwa Dibata enggo masu-masu ia (Imamat 27:30-32; Bilangen 18:21, 26 ras ogenta Ulangen 14:22-29). Perintah Dibata lako nehken persembahen persepuluhen tetap ilakoken gia e ibas Padan Si Ndekah. Si enda enggo tangkas arah pengajaren ras sikap Tuhan Jesus jine arah ayat ogenta Matius 23:23d nina, “Si enda (persepuluhen) arus idalankenndu alu la ngelupaken si debanna”. Tuhan Jesus mpersingeti mulihi inti Undang-undang Dibata eme ndalanken keadilen, nehken keleng ate, ras kinibujuren.

2.      Tema: “Nehken  Persepuluhen Alu Pusuh si Bujur”. Nehken persepuluhen la banci alu pekulah-kulah bagi guru-guru agama Jahudi ras kalak Parisi. Guru-guru agama ras kalak Parisi nehken persepuluhen ku Tuhan tapi keadilen, keleng ate ras kebujuren ndauh ibas ia nari. Pusuh si bujur eme pusuh si bersih, pusuh si ersuruh ndalanken keadilen, keleng ate ras kebujuren. Ula erkiteken ikut-ikuten maka si dalanken persepuluhenta, tapi erkiteken pusuhta si bujur ras pusuhta si erdilo ras nuruh kitalah lako mereken persepuluhenta.  

3.      Arah nehken persembahen persepuluhen, si cidahken kehamatenta man Dibata si enggo masu-masu geluhta. Kita ras keluargata erlajar nggeluh erpengarapen, ernalem ras erpengendes man Tuhan saja, labo arah materi/ duit. Sebalikna, kalak si la nehken persembahen persepuluhenna man Dibata, ia la mehamat ras la patuh man Tuhan. Iakapna kinilitenna e pelin-pelin arah kebeluhen ras gegehna jine. Erlajar kita secara pribadi bagepe secara keluarga terus-menerus nggeluh mehamat ras erkemalangen man Tuhan, nggeluh ertanggung-jawab nangdangi keperlun-keperlun Tuhan arah gerejaNa. Adi la kita si ertanggung-jawab nangdangi gerejata ise nari si ertanggung-jawab? Labo banci kalak si deban si ertanggung-jawab nangdangi gerejata. Bagepe labo kalak tertentu saja ngenca bas gerejata si ertannggung-jawab, tapi kerinana kita ertanggung-jawab.

4.      Arah nehken persembahen perpuluhen man Tuhan, kita ikut muat bagin ibas kerina dahin-dahin Tuhan arah gerejaNa. Persepuluhen pe igunaken man keperlun kalak Lewi (serayan Tuhan si gundari), bagepe nampati kalak si mesera baban geluhna eme: kalak pertandang, anak melumang, ras diberu si mbalu si membutuhken. Sadarilah maka lit kepe bagin ntah pe rejeki kalak si deban arah rejeki si ibereken Tuhan man banta. Labo kepeken rejekita gunanta saja ras guna keluargata, tapi lit ije rejeki ntah pe bagin kalak si deban eme kalak Lewi, kalak pertandang, anak melumang, diberu balu-balu si musil, dingen kalak si medanggel (bnd Ulangen 14:29; Matius 25:40).

5.      Uga cara engkira persepuluhen? Bas kai nari nge ikira? Bas gaji saja, ntah arah perulihen si debanna pe? Ntah arah total penghasilen ikurangi pajak emaka ibuat sepersepuluh? Adi la pas kal sepersepuluh, uga e? Adi isungkuni kal idealna tentu la lit jawapen si memuasken ras ideal nangdangi kerina penungkunen manusia. Janah melala denga penungkunen si banci siban kerna persepuluhen. Deba ban lalana penungkunenna ras terus ertak-tak uga si pasna kerna persepuluhen, piah lupa nehken persepuluhenna. Berekenlah rikutken ukur ersuruh, pusuh si bujur, penggejapen ras kinitekenta man Tuhan Jesus.

6.      Kesetian ersembah/ beribadah man Tuhan la terpisahken ras kesetian nehken persembahen persepuluhen man Tuhan. Kalak si nehken persepuluhenna, Tuhan erpadan tole masu-masu geluhna, jabuna ras kerina pendahin/ pencarinna (bnd Maleaki 3:10). Amin.  

                                                 Pdt. JURIS TARIGAN, M.TH