PJJ GBKP CENGKARENG 16 – 22 Agustus 2015 oleh Pdt. Dewi Ekawati Gurki

PJJ GBKP CENGKARENG

16 – 22 Agustus 2015

Bahan : Ulangan 6:10 – 15

Tema          : Ergakenlah Kemerdekaan

Tujun          : -  Gelah ngawan ni perpulungen nggejapken uga Dibata enggo mereken  kemerdekan man bangsnta.

-         Gelah ngawan ni perpulungen  ngassup ngergakan  ras ngisi kemerdekaan sienggo ibereken Dibata.

Penjelasan

1.    Bangsa Israel lit 430 tahun I Mesir (Kel 12: 40 – 41).  Menaken bangsa enda I Mesir eme ibas masa kesusuren Jakup , 70 kalak lebe, jenari  reh teremna she maka enggo ndemi Mesir ( Kel 1: 5-7).

Bangsa Israel I Mesir melala kal ngelakoken perbahanen si mehuli guna membangun Mesir ( masa Yusuf ikut erkuasa I Mesir) . Tapi kenca Yusuf mate, lit me Raja simbaru si la meteh sitek pe kerja Yusuf ( Kel 1: 8). Mulai je nari banga Israel  ngenanami kiniseran simesangat ( kerja paksa ras ibunuhi anak dilaki).

2.    Ibas kiniseran simesangat enda, serko bangsa Israel man Tuhan mindo penampat, janah Tuhan megiken pingko pingko bangsa enda ( Kel 3: 7 – 8…. Enggo Kuidah………enggo Kubegi…….Kueteh kerina……. Emaka Aku enggo nusur mulahi…… Cara Tuhan mulahi bangsa enda e me alu make Musa. Akhirna bangsa enda alu cara si ajaib, si la terukuri secara akal manusia, bangsa Israel ndarat Mesir nari. BebasNa bangsa enda ibas Mesir nari pelin pelin kal penampat Dibata. Adi la kin Dibata sinampatisa  asa ndigan pe bangsa enda labo banci pulah.

Kebebasen bangsa Israel e me Pemere ibas Tuhan nari.

3.    Ibas bangsa enda enggo bebas, ope ia bengket ku taneh Kanaan ( Kuta kemulihen), emaka Musa selaku pemimpin umat, mereken pedah pedah , gelah ola bangsa enda “ lupa kacang akan kulitnya” ntah  pe lupa anak  nandangi orang tuana  ntah pe lupa lembu nandangi tuanna simereken gagaten”.

Emaka nina Musa ibas bahan PJJ nta Minggu enda :

-         Ayat 10-11 :  Tuhan simereken sada negeri si labo bangsa enda majekkenca.  Ibas rumah e enggo melala  barang simehuli si labo bangsa enda namakenca. Lit je sumur labo bekasna ngkali. Lit ka -pe peken anggur ras zaitun la bo bekasna nuan.

(Bangsa Israel arus tuhu tuhu sedar kerna si e…lalit i- je bekas bangsa enda ngelakokenca)

-         Ayat 12 : Guna ngerespon pemere Tuhan e, iajuk Musa Bangsa enda: ULA LUPAKEN TUHAN….

-         Ayat 13-15: Carana la Lupa Tuhan eme kap :

Mbiarlah man Dibata alu la nembah Dibata sideban.

Bagem kepe ken Cara Musa ngingetken bangsa enda, gelah bangsa enda tetap jadi bangsa si patuh man Tuhan. Sabab ciga kel ate Tuhan adi lit bangsaNa nundalken Ia, Tuhan e percimberu kap , pernembehna bagi api ngengkernepken kalak si la setia man baNa.

Banci pe sibandingken tole ku  ayat enda: Ulangen 8 : 11- 18.

Aplikasi

70 tahun Indonesia merdeka…kita tentuna ngaloken kemerdekaan enda pemere Tuhan. Iluh ras dareh meler guna kemerdekan bangsa enda. Tuhu latih ibas masa masa perjuangen..tapi la sia sia, sebab Tuhan hadir guna njadiken bangsa enda bangsa si merdeka. Ku ga dage ninta ibas ngaloken kemerdekaan enda.

Peran ras tanggung jawabta i-timai bangsa enda. Jadi warga Negara si tuhu tuhu nggit  ngergaken kemerdekan enda alu nggeluh payo ras ngelakoken  perbahanen simehuli. Ola lupaken pengorbanen nini nininta ndube. Si-isi kemerdekan enda alu  tetap njaga perdamen.

Pdt. Dewi Ekawati Gurki, S.Th

MERDEKA ….MERDEKA…..SEKALI MERDEKA TETAP MERDEKA.

TUHAN SIMASU MASU INDONESIA.