BAHAN PA MAMRE TGL 08 – 14 FEB 2015 RG. GBKP CENGKARENG

BAHAN PA MAMRE TGL 08 – 14 FEB 2015 RG. GBKP CENGKARENG

Ogen : KEJ. 18:1-10                                                                                                      Tema: “PERBAPAN  GBKP”

Tujun : Gelah Perbapan GBKP meteh maka mamre eme ingan perjumpan antara Dibata ras manusia (Pribadi ntah pe organisasi)

Kata Perlebe :

Penggelaren man Perbapan ibas gerejanta GBKP eme Mamre, janah ibas 4 Persekutuan Kategorial si lit ibas GBKP  (KAKR, PERMATA, MORIA, MAMRE), Persekutuan Kategorial (lembaga) mamre me singudana. Gelar Mamre eme ibuat ibas ingan perjumpaan Dibata ras Abraham. I Mamre me Abraham ngalo-ngalo kerehen Ertina penggelaren e tentu mereken tanggung jawab si mbelin man kerina perbapan GBKP guna meteh fungsina selaku imam ibas jabu, si tugas ras tanggung jawabna eme mpejumpaken Tuhan ras isi jabuna, bagepe arah kegeluhen Mamre subuk secara pribadi bagepe selaku organisasi kalak si deban mengalami perjumpan ras Tuhan.

Penjelasen Teks

Kitab kejadian 18 enda eme nuriken kerna perjumpaan Abraham ras Dibata arah kehadiran 3 kalak dilaki silabo itandaina.

Ayat 1-3 : Ituriken ijenda maka tupung paksa si e wari she kal lasna, janah Abraham sangana kundul-kundul i lebe-lebe pintun kemahna. Alu la isangka-sangkana reh 3 kalak persuruhen Tuhan, sebab ituriken ijenda tupung ia jurgak je maka idahna 3 kalak temuena enda ndai. Emaka minter ia kiam ngalo-ngalosa janahna erjimpuh, ayona seh ku taneh. Si tuhuna sikap Abraham enda labo erkiteken ietehna si reh e Dibata ras malaikatNa. Enda dungna isadarina tupung temuena e nungkun kerna ija Sara ndeharana (ay. 9) dingen sekalak ibas temuena e nehken padan Dibata man Abraham kerna ketubuhen anakna (ay. 10).

Ibas  Padan Si Ndekah (PL), erjimpuh (sujud) la ngenca ilakoken man Dibata saja, tapi pe ilakoken nandangi:

1.      raja, pangeran, dsb (bdk. Kej 42:6  2Sam 9:8).

2.      orang biasa / yang sederajad (Kej 23:7  33:6-7).

Jadi, sikap Abraham erjimpuh ijenda labo erkiteken nggo itehna maka temuena e eme Dibata ras malaikatNa. Abraham kiam ngalo-ngalo sa aminna gia labo itandai na, sebab sada kebiasaan i daerahna (bdk Kej. 19:1-2) maka adi lit kalak mentas paksa las wari wajib i tawarken man ras minem, sebab enda perbahanen simehuli janah tradisi enda pe ipertegas ras iterusken alu perentah Tuhan man bangsaNa : “Ingetlah ngalo-ngalo kalak si kesilang ku rumahndu (Ibr. 13:2; Rom. 12:13 b).

Ay. 4-8 : Abraham ngalo-ngalo tamuna e alu mehamat,  itawarkenna guna singgah I rumahna dingen gelah banci ia ngelai si telu kalak e. Alu mehuli ras dem kehamaten Abraham ras anak jabuna, bagepe suruh-suruhen menjamu ras nikapken pangan si entabeh nandangi tamuna. Isikapkenna, lembu si nguda mbur, susu bagepe tepung si enggo i tasakken. Ijenda siidah uga Abraham labo mpertahanken statusna ilebe-lebei kalak si reh e, tapi ia sendiri pe alu meriah ukur langsung ngelai temuena e. Arah sikap siicidahken Abraham enda Mamre banci erlajar kerna:  kiniteruken ukur, nggit turun tangan nampati ras ndahiken sendiri guna nikapken si mehulina. La mpertahanken statusna selaku tuan si “tinggal perintah” nandangi suruh2enna. Bagepe nggit mengorbankan kai si lit ibas ia (korban materi). Nggo nge Mamre ngasup mpeteruk ukurna bagi Abraham enda ndai ? Aminna la itandaina si reh e tapi ipeterukna bana (erjimpuh seh ku taneh), nggit terjun langsung ngelai, mehamat ibas ngalo-ngalo dingen mereken si terbaik man kalak s ireh ku rumahna. Sebab lit ka nge perbapan e, erkiteken kepala Rumah Tangga emaka mentalna pe “mental Bos”, tinggal  perintah ras ielai saja ngenca atena dingen mberat kal ukurna adi ia ngelai. Kai siicidahken Abraham sithuna nggo sue kal ras Motto Mamre GBKP : Mamre erdiate, Mamre erpemere.

Ay. 9-10 : Emaka kenca enggo dung man maka nina sekalak tamue ngataken si wah bulan nari reh ka Aku ku jenda ije pagi Sara enggo mupus sada anak dilaki (sini itimai enggo ndekah). Arah perbahanen Abraham, ngelai alu mehuli menyediakan si terbaik nandangi tamuna alu ukur si bersih erbahanca ialokenna padan ras pemere Dibata, eme alu kehadiran anak dilaki si enggo ndekah itimaina.

Abraham me sosok Bapa si tetap ncidahken kiniteruken ukurna arah ia ngalo-ngalo ras ngelai tamuna sireh, la i belinkenna statusna. Tentuna arah bahan PA Mamre enda bage ka lah min perbahanen ras sikap geluh perbapan GBKP. Adi kerina Mamre memiliki sikap nggeluh bagi Abraham, meteruk ukur, la mbedaken status, nggit  melayani ise pe, nggit berkorban ras mpersembahken kai si lit ibas ia dingen ibas kai pe siilakokenna atena mereken si terbaik tentu reh majuna Mamre GBKP enda dingen reh teremna usur si pulung ibas kegiaten2 Mamre sebab kerina merasa ialo-alo alu dem keriahen ras kehamaten.

Arah ogen endape  mpersingeti perbapan/mamre maka lakap sia-sia perbahanen si mehuli nandangi Dibata bagepe manusia, sebab ndauh belinen  pemere sibereken Dibata man banta.

SELAMAT MELAYANI & TUHAN MEMBERKATI

(Pdt. Jenny Eva Karosekali STh. M.Min)