BAHAN PA MAMRE TGL 22-28 FEB 2015 RG. GBKP CENGKARENG

BAHAN PA MAMRE TGL 22-28 FEB 2015 RG. GBKP CENGKARENG

Ogen : Job 1:4-5                                         Tema: “Bapa Si Njagai Kebadiaan Jabu”

Tujun : Mamre Meteh silakoken Job guna njagai kebadiaan jabuna (anak jabuna).

            Mamre ndalanken tugas panggilenna guna ngayomi, njagai kebadiaan anak jabuna, bagi Job.

Penjelasen Teks :

Kitab Job nuriken kerna sekalak dilaki (perbapan) si bujur si tergelar Job si tading i negeri Us. Ituriken ijenda maka ia sekalak si nembah janah erkemalangen man Dibata, sekalak si mehuli, janah la lit perbahanenna si jahat (ay. 1). Arah teks enda siidah gambaren kegeluhen Job selaku bapa si ideal ras sempurna. Penekanenna ijenda eme: ia sekalak si nembah ras erkemalangen man Dibata, emaka labo mengheranken adi ia sekalak si mehuli janah la lit perbahanenna si jahat. Sebab kalak si erkemalangen man Tuhan kerina perbahanenna pasti si mehuli ras si ngena ate Tuhan. Alu kata si deban enda me ukuren ras tolak ukurna sekalak si nembah man Tuhan dingen erkemalangen man Tuhan. Adi dekahen nge si la mehuli silakoken ntah pe adi silakoken denga perbahanen si jahat ibas kegeluhennta banci sikataken maka kita lenga payo ras ertutus ate ibas nembah man Tuhan ras erkemalangen man Dibata. Janah kiniulin ras kesetiaan Job nembah ras erkemalangen man Dibata enda ibuktiken Job aminna kai pe si terjadi man bana.

Ay.4-5: Teridah uga kiniersadan anak-anak Job, aminna gia anakna si dilaki semal erbahan pesta man-man alu ergiliren tapi turangna si telu e pe tetap itenahkenna pulung. Janah bas bagin enda pe teridah uga Job berperan selaku orang tua (bapa) si erkiniteken ras ertanggung jawab nandangi kebadian ras keselamaten anak-anakna. Tiap kenca dung erpesta, lampas erpagi-pagi keke Job jenari ipersembahkenna persembahen tutungen guna pebadiaken anakna e sekalak-sekalak. Kai siilakoken Job enda ncidahken maka ia sekalak bapa si man usihen sebab:

-           iperdiatekenna lagu langkah anak-anakna,

-          tetap rukur kerna kegeluhen rohani anak-anakna,

-           alu tutus ertoto kerna anak-anakna gelah ula sempat erbahan ceda ukur Dibata alu la iarapna.

Kewajiben si penting ibas orang tua  eme mereken pengajaren ras perhatin la ngenca nandangi kegeluhen jasmani tapi pe terlebih kegeluhen pertendin anak-anakna. Janah lebih asa si e orang tua arus ngasup jadi contoh (teladan) ibas kegeluhen kiniteken nandangi anak-anak.

Tema PA Mamre : Bapa Si Njagai Kebadia Jabu. Ibas tradisi kalak Jahudi bapa eme sekaligus imam ibas tiap-tiap jabu si ertanggung jawab mabai kiniteken kerina anggota jabu (ndehara ras anak2) guna tetap nembah man Tuhan. Penungkunenna: Nggo nge kerina perbapannta  (Mamre) ngelakoken peranna selaku imam si ertanggung jawab mabai kiniteken isi jabu she maka kebadiaan jabu e pe terjaga? Ntah sebalikna lit denga ka nge Mamre e labo ia mabai isi jabuna tapi ia denga ka man baban ras man arak-araken?

Point penting dan Aplikasi:

Kai si banci siidah ras sisimpulken arah teks ogen enda eme:

1. Job, contoh imam ras bapa si jadi kemegahen man ibas jabuna sebab ertanggung jawab ia nandangi kegeluhen kiniteken anak-anakna. Job mediate nandangi  keselamaten anak-anakna lebihen asangken pendahin, ertana ras si debanna. Mekatep kita orang tua si genduari erkiteken kesibuken pendahin ras ndarami si man tadingenken lupa mperdiateken keselamaten pertendin anak-anakta,  perayakennta ras si utamana kal man banta ncukupken keperlun jasmanina saja ngenca.
2. Job tetap mpebadiaken kerina anak-anakna alu mereken persembahen tutungen man Dibata gelah ialemi Dibata dosa anak-anakna. Ertina enda jadi perenungen man orang tua terlebih Mamre gelah ngasup jadi orang tua (bapa) si ertanggung jawab nandangi keselamaten anak-anakta bagi siilakokenJob. Gelah kerina orang tua tetap mediate ras tutus ertoto kerna keselamaten anak-anakna gelah anak-anakta tetap ikawali Dibata ras tetap mbiar man Tuhan.
3. Kegeluhen kiniteken ibas jabu,  keselamaten ras pasu-pasu man isi jabu mbelin kal tergantung kubas peran orang tua terlebih bapa. Arah bahan PA Mamre enda iarapken lit tekad perbapan guna jadi Bapa si ertanggung jawab ibas kiniteken, jadi teladan ras usihen si mehuli dingen jadi bapa si erkemalangen man Tuhan seh maka badia kerina isi jabu, dingen njadiken jabu-jabunta jadi jabu si ipasu2 Tuhan (bdk. Masmur 128:1-4)

           SELAMAT MELAYANI & TUHAN MEMBERKATI

(Pdt. Jenny Eva Karosekali STh. M.Min)