BAHAN PA MORIA TGL 15-21 MARET 2015 RG. GBKP CENGKARENG

BAHAN PA MORIA TGL 15-21 MARET 2015 RG. GBKP CENGKARENG

Ogen : KOLOSE 3:12-15                                    Tema: “PAKEN KEDAMEN MABA KEMALEMEN ATE”

Kata Perlebe :

Perpulungen Kolose labo panteken Paulus tapi erkiteken lit pengajaran papak si berkembang ibas perpulungen Kolose emaka guna ngelawan pengajaran palsu enda Paulus nehken suratna man perpulungen e alu ngataken maka Jesus Kristus ngena si ngasup mereken keselamaten si serta labo kesah ras kuasa si lit i awang-awang.

Penjelasen Teks, Point ras Garis besar :

Rasul Paulus ibas teks ogen Kol 3 : 12 -15 mpersingeti perpulungen  kerna  statusna  selaku anak-anak Dibata si nggo ipilih Dibata jadi sikerajangenNa, erkiteken si e Paulus  nehken maka perpulungen e arus ngasup ncidahken cara/gaya geluh selaku anak-anak Tuhan, eme :

1.    Pakenna eme paken ate perkuah, mehuli, rukur meteruk, lemah lembut dingen sabar

(ay. 12b). Kegeluhen kalak si nggo iangkatNa jadi anak2Na arus ncidahken pembaharuan geluh ras nadingken kebiasaan geluh si ndekah, janah enda teridah perkuah ate, kiniteruken ukur, kelemah lembutan, kiniulin ras kesabaren ibas pengerana ras perbahanenna. Erpalasken si e kita perlu menguji/ mengevaluasi dirinta she ija paken ras gaya geluh si mbaru e nggo sipraktekken ras sicidahken ibas kerina dampar geluhta.  

2.    Gaya geluh si  la melukah megelut ras nggit si alem-alemen salah.  Ibas kegeluhen bergereja, mekatep kita jumpa la bagi ukurta, subuk arah pengerana ras perbahanen kalak man banta. Tapi teks enda mabai kita maka selaku anak2 Tuhan lanai siasuhi biak pergelut ras elem-elem,  emaka lanai torah sikiu (sikitiken ukur) tapi ngasup kita ngalemi ras sialem-alemen salah  bagi Tuhan nggo nggit ngalemi salahta (ay.13). Alu bage banci ibangun kiniersadaan anak-anak Tuhan ibas persadaan s idem kedamen.  Tuhan Yesus jadi teladanta ibas ngalemi kalak si erbahan jahat man bana (bdk. Luk. 23:24 a : “Ampunilah mereka, Sebab mereka tidak tahu apa yang mereka perbuat “. Yesus la ngenca la erbalas nandangi kejahaten siibahan kalak man baNa tapi sebalikna ngalemisa dingen itotokenNa.

Uga kita ? Bage sulitna nge ngalemi  kalak si nggo ersalah,  si ngelakoken si jahat man banta, mpe-melaken,  dingen si  erbahan mesui  ateta. Perlu si koreksi dirinta  maka situhuna  labo kita si benarna ras si mehulina, ertina kesalahenta pe labo tanggung buena tapi Yesus ngasup ngalemi kita emaka kit ape ituntut guna ngasup ngalemi salaj kalak sebab adi kit ape la nggit ngalemi slah kalak maka salahta pe labo ialemi Dibata (bdk. Mat. 6:14-15).

3.    Njadiken keleng ate jadi palas ibas kegeluhen dingen mbangun persadaan selaku anak-anak Tuhan, sebab keleng ate nge ngenca pengerakut si nteguh dingen serta (sempurna). 

Motto John Wesiey : (Bpk Gereja Methodis) mengatakan, lakukanlah segala macam kebaikan yang anda dapat lakukan dengan segala cara yang dapat anda lakukan disegala tempat yang anda jumpai, disetiap saat yang diberikan, bagi siapa saja yang anda jumpai, sejauh yang anda dapat lakukan. Anak-anak Tuhan labo nimai waktu  si tepat guna erbahan si mehuli tapi katawari pe berjuang guna ndalanken si mehuli e, janah kai pe siibahanna labo asal saja tapi idahikenna guna Tuhan (Kolose 3 : 23).

4.    Njadiken dame Kristus sierdahin  ibas pusuhta selaku anak-anak Tuhan, dingen ngajari kita ibas erbahan  keputusen2ta she maka tetap torah perdamen ras kedamen ibas persadanta. Janah persadaan s idem dame pasti mereken ulih kemalemen ate man banta. Selaku anak-anak Tuhan kesadaren si arus si peturah ibas dirinta : Tujun Dibata milih ras ndilo kita jadi anak-anakNa eme guna mbangun persadaan ras kiniersadaan kula s idem kedamen ras perdamen.

Mekatep si begi slogan si ngataken: “DAME ITU INDAH”. Slogan enda tentu ncidahken maka kerina manusia membutuhkan suasana dame sebab kedamen pasti mereken keriahen sebab nggeluh ibas perdamen ertina lalit perubaten, kekerasan, penindasan ntah pe tekanen nandangi pihak si deban tapi terjadi keadilan ras maba kinulin tentu man sekelewet adi lit perdamen. Moria, selaku anak-anak Dibata iajuk ras ituntut tetap nggeluh ibas perdamen, erlumba mpeturah perdamen, lanai lit permusuhen diantara kita, baik ersenina, erturang, erkalimbubu, sembuyak, anak beru bagepe ras kak sideban. Arah teks ogen PA Moria enda  mbabai kerina Moria gelah ulanai meriah iakapna ermusuhen ras ise pe. Sebab adi kita nggeluh ibas perdamen pasti malem ateta, meriah siakap nggeluh, nterem temanta ras ipasu-pasu Dibata geluhta.

( Pdt. Jenny Eva Karosekali STh. M.Min )