SERMON PJJ 30 JUNI 2015 RG GBKP CENGKARENG (Pebrianika Br Karo )

SERMON PJJ 30 JUNI 2015 RG GBKP CENGKARENG

(Pebrianika Br Karo )

Ogen: Ulangan 28: 1-6                                              Tema: “Dibata Si Masu-Masu Pendahin”

Tujuan :

§  Gelah ngawan ni perpulungen erpenggurun man Dibata ibas menaken dahin.

§  Gelah ngawan niperpulungen nggejabken maka Dibata si masu-masu pendahinna.

Latar Belakang

Bangsa Israel eme bangsa si i selamatken Dibata ibas taneh pembuangen nari, janah pe bangsa Israel enda me si jadi bangsa pilihen Dibata (Yesaya 41:8). Ibas perdalinen bangsa Israel ndarat I taneh Mesir nari bengket ku taneh perjanjian si enggo I pesikap Dibata (emekap taneh Kanaan) Musa la erngadi-ngadi empersingeti bangsa e kerna perentah-perentah Dibata. Salah sada emekap ibas ulangen 28 : 1-6, ipeseh Musa kerna perentah-perentah Dibata kerna kuga arusna bangsa Israel mengketi negeri Kanaan. Ibas paksa bangsa Israel ibas taneh perjanjin si jadi mata pencaharianna emekap sinuan-sinuan ras erasuh-asuhen. Emakana Musa selaku si ipilih Dibata guna empersingeti bangsa e gelah tetap patuh nandangi kerina perentah-perentah Dibata janahpe tetap setia nandangi Dibata.

Penjelasan teks :

Ibas paksa perdalanan Bangsa Israel bengket me ku taneh Kanaan lit piga-piga kali i ulihi Musa mereken nasehat ras pe empersingeti kerna perentah-perentah Dibata man Bangsa Israel (lih. Im. 26: 3-13, Ul. 7 : 12-24). Ibas ayat ogen PA-nta enda maka mulihi ka isingetken Musa kerna perentah Dibata janah ikataken Musa kerna Pasu-pasu si ibereken Dibata. Si menarik arah ogennta enda emekap lit dua bagin, sipertama, lit sarat si itentuken Dibata, sipeduaken, lit ulih. Dua bagian enda me si jadi pesan ibas ogenta enda. Saratna emekap megiken janah ndalanken kerina perentah Dibata, jenari maka ulihna pasu-pasu si rehna Ibas Dibata nari kempak bangsa Israel. Nina Musa man Bangsa Israel : ikutkenlah Tuhan Dibatandu maka kerina pasu-pasu enda jadi sikerajangenndu : Tuhan masu-masu kuta ras jumandu. Tuhan masu-masu kam maka kam ertuah, bayak, maka nterem pupusndu, melala pagendu, melala lembundu ras biri-birindu. Tuhan masu-masu sinuan-sinuanras pangan si ibahan i bas sinuan-sinuan e nari. Tuhan masu-masu kerina pendahinndu (Ul. 28 :3-6).

Persaraten si ibereken Dibata arah perantaran Musa sada ngenca, emekap “ikut ras patuh nandangi perentah Tuhan Dibata. Janah adi enggo ilakoken bangsa Israel persaratan si sada e, jenari bangsa e dat pasu-pasu idur Dibata nari, kerina pendahin i pasu-pasu Tuhan Dibata. Kalak si setia kap si i selamatken Dibata ras nggeluh seh ku bas taneh si ijanjikenNa e (lih. Ul 4: 4).

Aplikasi :

jaman genduari enggo melala jenis pendahin manusia lit deba erdagang, ku kantor janah pendahin si debanna. Nai-nai nari pada umumna si eteh maka pendahin manusia eme erjuma ras erasuh-asuhen. Sie kerina teridah perbahan bangsa e bengket ku taneh si ijanjiken Dibata eme taneh Kanaan. Ija si eteh maka Taneh eme taneh si mehuli janah mehumur (Keluaran 3 : 17),  Jadi wajar adi kalak Israel bermata pencaharian petani ras pe erternak. Kerina pendahin e mereken ulih si mehuli perban i pasu-pasu Tuhan Dibata kap, adina si perdiateken proses ibas pendahinta e maka teridah kal uga mbelinna pasu-pasu Dibata man banta bage pe man bangsa Israel. Pasu-pasu Dibata e nge si erbahanca sinuan-sinuan ta jadi ulih pangan man banta, pasu-pasu Dibata eme si erbahanca merih asuh-asuhenta.

Kerinan pasu-pasu Tuhan Dibata e sidat arah si lakoken perentah-perentah Dibata ta, bagi si tertulis ibas Yakobus 1 :25 nina kalak si mperdiateken pedah Dibata alu mehuli, si terus mpergermetkenca, si la megi-megi saja, kalak sibage ipasu-pasu Dibata ibas kerina pendahinna. Sebab pedah Dibata e serta kap dingen ngasup mbebasken manusia. Emaka pedah dingen perentah Dibata enda labo terjeng man beginken saja tapi arus nge si dalanken gelah sidat pasu-pasu Dibata ta.

Sendalanen ras minggu merdang, nuriken man banta kerna kai si erdangken kita e la si eteh kuga carana maka seh erbuah. Makana si idah me uga kerna mbelin na pemasu-masu Tuhan maka seh paksana benih si nisuan e erbuah ras banci iperani, tapi adi la si dalanken pedah ras perentah Dibata pasu-pasuna e labo maler man banta, sebab adi la ipasu-pasu Dibata benih sierdangken e pe banci la ia si mperanisa (Mikha 6:15). Konsep kerna merdang enda identik dengan konsep perjuma, tapi adi sinehan ku kondisi si genduari pendahin manusia e labo terjeng kujuma ras erasuh-asuhen nari ngenca. Enggo melala jenis pendahin manusia janah e labo erbahanca maka kita lanai ndalanken pedah ras perentah Dibata, tetaplah sipakeken kata Dibata jadi palas pendahinnta. Sebab adi merdang kalak ibas juma perukuren secara manusia, iperanina, me ulihna si la macik ibas juma perukurenna e nari. Adi nuan ia ibas juma kesah Si Badia, iperanina me kegeluhen si rasa lalap ibas kesah Si Badia nari.

Ertina iajuk kita ibas kerina pendahinnta tetaplah si dalanken kerina perentah Dibata ta, janah ibas erbage corak pendahinnta genduari maka tetaplah erpenggurun man Dibata janah tetap nggejabken ulih pendahinta e, sebab alu bage maler kap pasu-pasu Dibata man banta janah lit ulih ibas pendahinnta nari. Mari kita ngerdangken si mehuli bagi singena ate Dibata gelah banci si perani simehuli.