SUPLEMEN PJJ 2I JULI 2015 RG. GBKP CENGKARENG Pebrianika Br Karo

SUPLEMEN PJJ 2I JULI 2015 RG. GBKP CENGKARENG

Pebrianika Br Karo

Ogen : Epesus 6 : 10-13                                                         Tema : “Ngelawan Kuasa Gelap”

Latar Belakang Teks

Surat epesus emekap surat si langsung ikirim Paulus man jemaat I Epesus. Tujun Paulus erban surat e gelah kerina jemaat Epesus tetap ersada ras Dibata, ija igambarken Paulus uga kiniersadan si tuhu-tuhu ibas Dibata. Ibas epesus 6 :10-13 ituriken kerna senjata si ibereken Dibata guna ngelawan akal iblis. Kuasa iblis e igambarken seri ras kuasa gelap, janah kuasa gelap e me si arus i lawan janah ibas bahan ogen PJJnta enda ituriken kerna alat entah pe senjata-senjata si ibereken Dibata.

Penjelasan Teks :

Iblis emekap kuasa sigelap si atena mpesirang manusia ras Dibata, janah Epesus 6 : 10-13 ituriken kerna cara ngelawan kuasa si gelap e. poin si pertama si ipeseh Paulus man jemaat i Epesus emekap mengenai persadan jemaat e ras Dibata, emaka nina Paulus ibas suratna e ; kedungenna, megegehlah kam erkiteken persadanndu ras Tuhan dingen erkiteken KuasaNa si mbelin (ay. 10). Pesan si ipeseh Paulus maka jemaat e tetap ngasup njaga hubungenna ras Dibata sebab Kuasa Dibata e me si mbelin asangken kuasa sideban. Pesan sipeduaken si ipeseh Paulus man jemaat Epesus emekap ; pakekenlah kerina senjata si ibereken Dibata gelah ngasup kam tedis ngelawan akal Iblis si jahat e (ay. 11). Igambarken maka iblis e jahat janah harus ilawan alu senjata si ibereken Dibata. E maka genduari pakekenlah kerina senjata si ibereken Dibata, gelah adi reh pagi paksa si jahat e, ngasup kam ngelawan serangen-serangen musuh, janah kenca erperang she kedungenna, tetap denga kam tedis alu megegeh (ay. 13).

Li pe senjata-senjata si imaksudken Paulus e mekap (ay. 16) :

·         Ketuhu-tuhun jadi benting

·         Kinibujuren jadi baju besi guna erperang

·         Keriahen ukur meritaken Berita Si Meriah kerna kemalemen ate jadi sepatu

·         Kiniteken jadi ampang-ampang

·         Keterkelinen jadi topi waja

·         Kata Dibata jadi pedang si ibereken Kesah Dibata

Alu sie kerina maka banci inimpetindu kerina anak panah si gara si ipanahken si jahat, janah sie kerina la lupa Paulus mpeseh man jemaat Epesus gelah toto jadi palas ibas ngelawan si jahat e. si itekanken Paulus man jemaat e emekap persadan jemaat e ras Dibata, sebab arah kiniersadan e me si erbahanca jemaat e mpengasup jemaat e ngelawan tipu muslihat iblis si jahhat e.

Aplikasi : kuasa si gelap labo jarang si jumpai ibas kegeluhennta, iblis katawari paksa pe banci kita I dahi na janah banci bene kita ibahanna. Kuasa si gelap e banci erbahanca kita ndauh ibas Dibata nari. Kuasa gelap e banci reh ibas dirinta nari, contohna arah perukuren jahat si turah ibas kita, janah arah sifat-sifat si la mehuli contohna pernembeh, percian ras si debanna. Sifat sie kerina banci erbahanca kuasa iblis si ngkuasai dirinta. Emaka arah bahan ogennta enda maka iajarken man banta uga harusna silawan kuasa gelap e, cara na eme ngandalken Kuasa Dibata janah tetap erpengendes man ia.

Ibas kegeluhen manusia rusur kap biak si lit ibas manusia e jadi alat man kuasa si gelap e guna menyesatken manusia, sebab awalna nari pe manusia e enggo erdosa janah nukah kel iakap iblis masuk janah menghasut manusia e. ibas sie maka Paulus pe mpersingeti man jemaat Epesus kerna kuasa Iblis si jahat e banci I lawan alu Kuasa Dibata si mbelin. Sebab ise pe labo ngasup ngelawan Kuasa si Mbelin e (Kuasa Dibata).